Allt og ekkert

27. júlí 2004 | 0 aths.

Fyrsti vinnudagur eftir frí á morgun - jibbí!

Mér sýnist ljóst að ég fæ ekki inni á þessum kollegíum sem ég sótti um á í þessari umferð - þess í stað get ég skráð mig á akút-lista og á þá von um að fá eitt "take it or leave it" tilboð um herbergi/íbúð hvar sem er á stór-Kaupmannahafnarsvæðinu. Það bendir því allt til þess að ég muni kynnast almenningssamgöngum baunanna á eigin rassi af eigin raun.

Hvernig fer maður eiginlega að því að velja sér rúm í verslun?

Ég geri ráð fyrir að kaupa mér rúm úti í Köben og hef uppi áform um að fara í IKEA þarlendra í þeim erindagjörðum. (Hvað skyldu annars Billy, Benno, Ivar og Klippan heita á dönsku?) Til að flýta fyrir ákvað ég að kíkja í Holtagarða og máta rúm. Púff...

Er yfir höfuð (undir sæng) mögulegt að velja sér besta rúmið fyrir 8 tíma notkun á sólarhring næstu x árin með því að leggjast í það í 1 mínútu? Og hvað er þetta með að hafa misþykkar yfirdýnur á öllum dýnunum? Hvernig á að vera hægt að bera saman undirdýnurnar þannig? Ég fór a.m.k. út tómhentur (ekki að annað hafi staðið til). En ég fékk mér þó pylsu fyrst ég var kominn á staðinn.

Annars er eiginlega sorglegt að maður skuli vera að spá í verð á rúmum - það er ekki eins og það sé nein önnur fjárfesting sem maður á eftir að nota jafn mikið og er jafn mikilvægt að takist vel að velja (nema kannski nærbuxur, en það er einfaldara að skipta þeim út). Hvað munar mann um nokkra þúsundkalla til eða frá þegar góður nætursvefn um ókomna tíð er í húfi?

Svo er maður nú einu sinni að fara til Köben þannig að ég dustaði í dag rykið af hjólinu, dröslaði því við illan leik út á næstu bensínstöð og blés í það þrýstilyftu lífi. Eftir þá fyrstu hjálp hjólaði ég með það (með því?) vestur á Seltjarnarnes til yfirhalningar og uppherslu í höndum fagmanna.

Á bakaleiðinni fór ég í Hagkaup að græja hráefni í lasagne veisluna sem ég hafði lofað litla bróður. Sólin skein og mér var farið að hitna þegar það rann upp fyrir mér ljós; í svona veðri matreiðir maður ekki lasagne - maður grillar!

Litli bróðir heppinn. Mér brást ekki tangarlistin frekar en fyrri daginn (þótt ég segi sjálfur frá).

Partímál flækjast og skýrast á víxl. Nú liggur fyrir að frændsystkinagrillið verður laugardaginn 21. (sama dag og maraþon og menningarnótt). Ég stefni enn á partí hér um verslunarmannahelgina, stefnir í fámennan en vonandi góðmennan hitting (kjölfestan Jón Heiðar var reyndar að hlaupa úr skaftinu, en samt...), trúlegast á laugardagskvöld. Þá eru tvær helgar eftir og ætli maður neyðist ekki til að halda partí báðar þær helgar? Kemur í ljós, kemur í ljós.

Nú væri skynsamlegt að fara snemma að sofa. En hvað geri ég...?