Að koma sér fyrir í skápnum

27. september 2004 | 0 aths.

Í fyrsta sinn á minni löngu skólagöngu hef ég nú lyklavöld að alvöru læstum skáp eins og tíðkast í amrískum skólabyggingum. Umræddur skápur er á 2. hæð (3. skv. íslenskum skilgreiningum) og númer 144. Ég veit ekki hversu margir nemendur eru í skólanum, en lauslega áætlað myndi ég skjóta á að skáparnir séu milli 500 og 600.

Fyrst þurfti ég reyndar að byrja á því að verka út úr honum þykkt botnryk sem setti leiðinlega mark sitt á allt sem inn í hann var sett. Nú er það að baki og þá er að koma sér fyrir og ákveða hvernig ég ætla að nota hann.

Ég er þegar búinn að kaupa sitthvora súkkulaðipakkninguna í Netto, enda hefur reynslan kennt mér að þegar líður á daginn er oft þörf á orkuskoti og það er mun ódýrara að kaupa sykurinn í Netto heldur en í sjálfsölunum. Þegar ég fer á hjóli í skólann fer hjálmurinn inn í skáp og síðastliðinn föstudag skellti ég jakka og tösku inn í skápinn áður en ég fór á fredagsbarinn með Sjöfn.

Það eru hins vegar fleiri möguleikar í stöðunni. Ég gæti verið heilsusamlegur og reynt að eiga ávexti í skápnum (hef reyndar vissar áhyggjur af því hvernig þeir geymast, en það ætti ekki að vera neitt mál). Því miður gleymdust Ecco inniskórnir heima, annars væru þeir eflaust búnir að eignast heimili í skápnum.

Ég gæti líka geymt handklæði og nærfataumgang í skápnum, þannig að ef ég þarf virkilega á hressingu að halda gæti ég skellt mér í sturtu í kjallaranum og komið ferskur aftur til starfa. Það jafnast fátt á við kalda/svala sturtu til að vekja mann af drunga.

Margir möguleikar... Spurning hvort að IKEA eigi geymslulausnir fyrir skólaskápa til að nýta plássið sem best?