Allt á fullu

16. desember 2004 | 0 aths.

Í gær, miðvikudag, vorum við í skólanum frá 10 til 21. Sátum inni í einu af glerbúrunum og böggluðum saman textanum okkar. Um kvöldmatarleytið fóru stelpurnar í það að lesa yfir stafsetningu og orðalag (ég var skiljanlega gagnlítill í því). Þess í stað dúllaði ég mér (of mikið) við að teikna upp flotta forsíðu. Eftir yfirlesturinn braust svo út létt panikkast.

Þegar Mette sendi "endanlega skjalið" á okkur hin reyndist það tómt (ég fékk upp blaðsíðu með "This page uses frames, but your browser does not support them"). Ekki skemmtilegt þegar Word skjal á í hlut!

Þessu var þó bjargað fyrir horn og skjalið endurheimt.

Við slitum fundi um níuleytið og þegar ég á leiðinni út spjallaði við einn af skólabræðrum mínum og játaði að við hefðum bara setið við í 11 tíma svaraði hann "Bara kæruleysi?". Þetta er nota bene orðrétt tilvitnun, enda sagt á íslensku.

Ég spjallaði svo lauslega við kunningjagrúppu sem undanfarnar vikur hefur verið búsett í nánd við skápinn minn. Þeir voru þokkalega bjartsýnir en sáu fram á erfiðan næsta dag (í dag). Einn bætti þó við "Men sjov!". Þegar félagi hans gerði sig líklegan til að berja hann í höfuðið bætti hann við með pókersvið "På en masokistisk måde..."

Þegar heim kom rétt fyrir 22 velti ég því fyrir mér hvort ég ætti að ræsa upp Surtlu og skrifa þessa færslu, en ákvað að ég hefði gott af smá pásu.

Þess í stað las ég Photoshop bók fyrir svefninn :)

Verkefni dagsins að skrifa niðurlag og samantekt. Hittum svo kennarann okkar um hádegið og ef hann varpar ekki sprengju inn í verkefnið vonumst við til að geta prentað gripinn út seinnipartinn eða í kvöld.