Kenningin um smáþorpið staðfest

04. september 2005 | 2 aths.

Ég hef áður haldið því fram að Kaupmannahöfn sé íslenskur smábær og í dag fékk ég ákveðna staðfestingu á því.

Eftir hádegið sló ég á þráðinn til Aðalsteins til að hlera hvað hann hefði fyrir stafni, með það í huga að hittast kannski á kaffihúsi á Vesterbro þar sem hann býr núna. Hann var í göngu, en við ákváðum að ég myndi hringja í hann þegar ég væri kominn á svæðið til að athuga hvort hann væri kominn heim.

Klukkutíma síðar lagði ég af stað upp á meginlandið og fór upp á Vesterport stöðina. Þaðan rölti ég svo í hundaskít og hægðum mínum vestur eftir Gammel Kongevej.

Rétt vestan við Planetariumið staldraði ég við fyrir framan búðarglugga og ákvað að hringja í Steina. Þegar ég leit upp var kunnuglegt par fyrir framan mig; Aðalsteinn og Gunnur!

Ég stóðst ekki mátið, rölti á eftir þeim í rólegheitum og hringdi í Steina úr 10 metra fjarlægð.

Af öllum þeim andlitum sem ég hefði getað hitt í Köben rakst ég sem sé á þann sem ég ætlaði að hitta, rúmlega 10 mínútna gang frá íbúðinni þeirra.

Þar voru svo steiktar prýðilegar pönnukökur, bornar fram með rjóma þeyttum í mjólkurfernu.