Flengdur!

08. desember 2005 | 4 aths.

Í gærkvöldi þvældist ég (einu sinni sem oftar) inn á bloggsíðu, þar smellti ég á eitt af þessum dæmigerðu nettestum og var flengdur.

Þetta reyndist sem sé vera hrekkur sem ég kolféll fyrir, þrátt fyrir að þykjast vera netfróður (og kannski í og með vegna þess að ég þykist vera netfróður).

Ég er enn skælbrosandi yfir því hvað ég féll glæsilega í gildruna. Skondið nokk, þá þóttist ég finna örlítinn fisklegan þef en bældi síðan niður þá tortryggni og ýtti á takkann.

Mér varð svo mikið um að ég frussaði næstum á skjáinn þegar blekkingin lá ljós.

Það er kannski ekki skrýtið að glæponar eigi auðvelt að hafa af saklausum viðkvæmar persónuupplýsingar þegar það þarf svona lítið til að plata tortrygginn "fræðing".

Auðvitað hefði ég getað leitað óbeinna hefnda með því að segja ekki orð, heldur siga lesendum mínum á sömu gildruna. Það væri hins vegar ekki í samræmi við ritstjórnarstefnu thorarinn.com og ég myndi aldrei gera vinum mínum slíkan óleik (nema auðvitað um væri að ræða hrekk sem ég hef sjálfur samið frá grunni).

Boðskapur sögunnar er:

Fólki sem heldur dagbækur á netinu er ekki treystandi, og maður á að láta það ógert að gramsa í slíkum seint á síðkvöldum. (Þ.e. dagbókunum þeirra.)

Af mér er annars það að frétta að ég hef núna vaknað (og komist framúr) á réttum tíma tvo morgna í röð og að ég er með bólu á nefinu.

Lífið er ljúft.