Jólagjafainnkaupaleiðangur

16. desember 2005 | 2 aths.

Svei mér þá, jólagjafainnkaupum ársins er barasta lokið (nema ég á eftir að finna eitthvað handa manninum sem ég hitti alveg tvisvar á síðasta ári (samtals kannski í 5 klukkustundir); Albert frænda).

Fimm jólagjafir og jólaskyrta á nokkurn vegin nákvæmlega tveimur og hálfum tíma þykir bara nokkuð gott á mínum bæ. Ég þræddi Strikið og nágrenni nokkuð vandlega, en gætti þess þó vandlega að versla eftir föngum í "heimabyggð" á norðurenda Striksins.

Svo stóðst ég ekki mátið að taka einn aukarúnt til suðurs bara svona til að upplifa stemmninguna og gefa handleggjunum færi á að lengjast aðeins vegna burðarþunga. Þegar strætóinn skilaði mér svo heim var ég hálf dasaður, gleymdi meira að segja að Microsoft ætlaði að vera með einhvern glaðning á fredagsbarnum. Öðruvísi mér áður brá.

Ég er ekki alveg búinn að sjá hvernig ég ætla að koma gjafastaflanum heim á Ísland, en það hlýtur að reddast einhvernvegin.

Og nú er efnt til enn einnar verðlaunagetraunar thorarinn.com:

Jólaverðlaunagetraunin 2005

73 cm eru:

1. Vegalengdin heiman frá mér og upp á Kóngsins Nýtorg.
2. Þykktin á skautasvellinu á Kóngsins Nýtorgi.
3. Samtals hvað handleggirnir á mér lengdust við að drösla innkaupunum heim.
4. Hæðin á gjafastaflanum (óinnpökkuðum).
5. Þykktin á verkefninu sem ég er að skrifa, útprentuðu í 12 pkt. letri og tvöföldu línubili.

Hvar skyldi límbandið vera...