Hamhleypa til innkaupa

19. janúar 2007 | 2 aths.

Undanfarna viku hef ég aðeins verið að svipast um eftir jakkafötum, enda hef ég sannfærst um það upp á síðkastið að jakkafötin mín eru í það stærsta.

Ég þarf hins vegar "long" snið, og slík jakkaföt eru ekki á hverju strái, ekki einu sinni innan viðurkenndra herrafataverslana.

En líkt og fram kom í inngangstextanum þá er ég að öllu jöfnu ekki sérlega gefinn fyrir verslanaþvæling. Hins vegar kemur fyrir, sérstaklega ef ég veit að mig vantar eitthvað og finn það, að ég kemst í gír og kaupi þá margt og mikið.

Sem hluta af þessum jakkafataskoðunum fann ég mig til dæmis í Smáralind í gær og eftir að hafa farið sneypuför um herrafataverslanir lá leið okkar í Hagkaup að versla í matinn. Það endaði með því að ég keypti handklæði, salatskál, myndaramma og laxaskurðarbretti (með hníf!) auk matar.

Allt eitthvað sem mig bráðvantaði, að sjálfsögðu.

Í dag kíktum við svo á Herra-lagerinn í Skeifunni, verslun sem ég vissi ekki að væri til fyrr en við rákumst á hana í gær (í leit að Herrafataverslun Birgis) (vonlaust þetta gatna/númerakerfi í Skeifunni) um það leyti sem báðum var skellt í lás.

Við kíktum aftur í dag og það endaði með því að ég keypti mér jakkaföt, útivistarjakka, trefil og tvær peysur, allt á 80% afslætti. Pakka sem hefði slefað í rétt tæp 100 þúsund miðað við upphaflegt verð.

Alex greyið vissi varla hvaðan á sig stóð veðrið...

Allt held ég að þetta séu hlutir sem ég á eftir að geta notað - sem er ekki alltaf raunin þegar útsölubrímann bráir af manni (hóst).

En það sem var kannski merkilegast er að þarna var langbesta úrvalið af jakkafötum í long stærðum sem ég hef séð í Reykjavík - og aldrei að vita nema ég kíki þangað oftar.

(Enda lít ég á það sem stóran gæðastimpil að rekast á Ödda Kristins þarna, en að frátöldu ljóta prjónabindinu sem hann keypti í Portúgal er hann smekkmaður á fatnað.)

(Sem aftur rifjar upp samviskubit mitt yfir þeim vinum og kunningjum sem ég hef enn ekki heimsótt eftir að ég sneri heim á klakann.)