thorarinn.com

Akkurru beta, akkurru?

10. apríl 2005 | 7 aths.

Nú er nýja útlitið búið að vera "lífs" í rúma viku, en beta merkingin hefur ekkert haggast. Það er nú aðallega vegna þess að ég hef ekki gefið mér tíma í að stússast í að snurfusa það sem upp á vantar til að ég verði alveg sáttur.

Fæst af því er reyndar nokkuð sem normal gestur tekur eftir (orðið normal er hér notað með fullri virðingu fyrir þeim gestum sem höfðu tekið eftir þessum hnökrum).

Það sem er þó mest sýnilegt er að ég er ekki alveg sáttur við það hvað enskir og íslenskir textar grautast mikið saman. Ég geri það mjög meðvitað að hafa bæði tungumálin, en frá notagildissjónarmiðum séð er lágmarkskrafa að það sé augljóst hvaða textar eru á ensku og hverjir íslensku. Ég hef velt því fyrir mér að nota einhvers konar litaleikfimi til að aðgreina tungumálin en hef ekki dottið niður á smekklega leið í því samhengi.

Framtíðarmúsík er trúlega að setja lang="is" eða lang="en" á öll mörk eftir því sem við á. Jafnvel gæti ég þá um leið græjað fiff til að bjóða upp á "English only" útgáfu af vefnum (og öfugt).

Nýju textarnir eru líkar frekar hráir, ég er þó nýbúinn að uppfæra íslensku ferilsskrána í tengslum við sumarvinnuleitina. Hinir bíða betri tíma.

Ég á líka eftir að koma handritinu að "Á uppleið" inn á textasíðuna og sitthvað smálegt í þeim dúr...

Meira á nördastiginu er að ég þarf að lagfæra html-ið á bak við kommentabirtinguna, búa til tvær millistigstöflur til að gera forsíðuna og færsluyfirlitið hraðvirkari (það er náttúrulega hneyksli að forsíðan taki allt að 0,3 sek af servertíma í smíðum og dagbókarsíða jafnvel meira). Svo þarf ég að græja RSS af kommentunum, ákveða hvernig ég ætla að birta ljósmyndasöfn, kannski græja smá Regular Expression (reglulega segð) til að skipta tommugæsalöppum út fyrir ekta íslenskar og svo ótalmargt fleira...

Beta-stimpillinn verður þó líklega látinn hverfa áður en ég verð búinn að þessu öllu - enda ólíklegt að það verði fyrr en um það leyti sem ég kemst á ellilífeyri...