04. júlí 2005 | 2 aths.
Eftir annasaman endasprett í veldi bauna þar sem gekk á ýmsu og margt fór öðru vísi en til stóð, er ég nú kominn heim á klaka og hef tekið upp búsetu á Fálkagötunni. Allt fór baunastússið vel að lokum og röðin á Kastrup reyndist þrátt fyrir allt ekki lengri en svo að ég hafði það af að komast í vélina. Heima í Keflavík tóku foreldrarnir óvænt á móti mér og á laugardagskvöldinu fórum við familían út að borða að fagna mastersgráðu Sigmars.
10. júlí 2005 | 0 aths.
Nú er Surtla mín blessunin komin aftur til heilsu. Bekkjarbróðir minn úr grunnskólanum, Eiríkur Emils, lagaði hana með því að skipta um minni í henni - eins og mig grunaði fyrst virðist sem það hafi verið minnisglöp sem voru að hrjá hana. Það eru því allar forsendur fyrir því að færa til bókar helstu atburði liðinna vikna. En samt...
11. júlí 2005 | 0 aths.
Þá er kominn tími á örlítið umaxlarlit og segja frá fjörinu sem einkenndi síðustu dagana mína í Köben þegar sannaðist að hinar vandlegustu áætlanir eru einmitt þær sem klikka með mestum glæsibrag.
13. júlí 2005 | 0 aths.
Verandi bíllaus og starfandi rétt utan göngufæris er ég háður stóru gulu vögnunum um flestar mínar ferðir þessa dagana. Áður en ég fór til Köben fannst mér í þau tiltölulega fáu skipti sem ég tók strætó að auk mín væru þar bara börn, gamalmenni og andlegir öryrkjar af ýmsum toga. Þótt það samræmist ekki fregnum af brjáluðum trukkainnflutningi frá Bandaríkjunum - þá hef ég á tilfinningunni að strætó sé meira notaður núna en áður, jafnvel af venjulegu fólki...
13. júlí 2005 | 0 aths.
Reyndar mun réttari tilvitnun í Charlies Angels vera "Damn you, Salazar" (líklega bestu tilþrif á kvikmyndaferli Matt LeBlanc), en mig vantaði X í bölvunina. Sigmar bróðir keypti nebbnilega X-Box í Danmörku sem liggur ansi freistandi við höggi hérna í stofunni. Ekki svo að skilja að ég sé ALLTAF að spila eða horfa á einhvern spila, en ég sé heldur ekki fram á að skrifa the great Icelandic novel í sumar...
15. júlí 2005 | 0 aths.
Líðanin í morgun var heldur undarleg. Ég var ekki þunnur og ekki syfjaður (ekki svo að skilja að það teljist undarleg líðan að vera laus við timburmenn á föstudagsmorgni). Hins vegar sat rauðvínsþamb gærkvöldsins og stuttur svefn í mér í mynd sem jaðraði við höfuðverk og olli ákveðnum einbeitingarvanda. Eins konar þokubólstrar á heila...
16. júlí 2005 | 0 aths.
Í gær skellti ég á vefinn nýjum myndum af Vilborgu frænku minni. Þar eru í sérstöku uppáhaldi hjá mér þessi fyrirsætutilþrif:
18. júlí 2005 | 2 aths.
Það er ekki margt sem toppar það að komast í New York Times, en ég held að frétt dagsins á Wired fari langt með það...
19. júlí 2005 | 0 aths.
Ég áttaði mig á því í dag að nú hefur ekki rignt í rúma tvo sólarhringa. Hvað verður eiginlega um blessaðan gróðurinn? Mér er spurn. Heima í sveitinni þar sem aldrei rignir (en úðinn getur stundum orðið svolítið þéttur) var það viðkvæðið þá sjaldan úðaði úr lopti að þetta væri nú gott fyrir gróðurinn...
20. júlí 2005 | 0 aths.
Í Hagkaup(i/um) í gær voru tveir náungar á þrítugsaldri að fylla á hillur. Báðir voru þeir með hár langleiðina niður á axlir og annar þeirra starði á mig í hvert sinn sem ég átti leið hjá (sem var oft, enda hafði ég enga hugmynd um hvar neitt var). Ég fékk helst á tilfinninguna að hann væri að bíða eftir að ég sýndi leynilega fingramerkið til að staðfesta að ég tilheyrði leynireglu lubbanna.
20. júlí 2005 | 0 aths.
Nýjustu fréttir af fjölmiðlaæðinu í kringum Open Source bjórinn okkar eru þær að gestabókin á vefnum er full af kommentum frá Þjóðverjum sem höfðu lesið um fyribærið í Der Spiegel. Nú skilst mér að BBC sé að vinna að einhverju og vilji fá mig í símaviðtal!
20. júlí 2005 | 0 aths.
Eru einhverjir lesendur í áhugaleikgeiranum á leið í Heiðmörkina á laugardaginn? Ég hef áhuga á að snapa mér far þangað...
24. júlí 2005 | 0 aths.
Á fimmtudeginum tók BBC World Service við mig símaviðtal um hlutdeild mína að bjórbrugguninni og það hvernig hugmyndir að verkefninu hefðu kviknað. Ég hef reyndar ekki getað grafið upp hljóðdæmi, en þetta var komið samdægurs á vefinn hjá þeim sem landafræðispurning(!). Í svarinu eru svo nokkrar beinar tilvitnanir í mig - þannig að hver veit nema ómþýðri rödd minni hafi verið útvarpað yfir alheim?
24. júlí 2005 | 0 aths.
Á laugardaginn var haldið hið árlega bræðramót í golfi á Setbergsvelli í Habbnarfirði. Réttara væri ef til vill að segja að það hafi verið haldið á laugardagsmorgni, enda voru barefli dregin út úr sjálfrennireiðum fyrir klukkan níu! Ég hélt uppteknum hætti og sýndi mest bruðl með höggafjöldann (og reyndar kúlur líka).
24. júlí 2005 | 0 aths.
Ég er kannski að tapa mér í stuðlunum fyrirsagna, en hér eru tvær áhugaverðar síður sem ég hef rekist á í vikunni. Bráðsnjallt lyklaborð og lygilega flottar þrívíðar stéttateikningar.
28. júlí 2005 | 2 aths.
Á mánudagskvöldið tók ég hjól litlu systur traustataki og hjólaði í drjúgum strekkingi út á granda til að sjá leiksýningu. (Takk fyrir lánið Margrét!) Þar var um að ræða hálfopna lokaæfingu Hugleiks á Undir hamrinum (Country Matters) sem nú hefur verið fluttur til Mónakó og verður fluttur þar einhvern næstu daga.
28. júlí 2005 | 2 aths.
Ekki í þeim skilningi að mér hafi verið rennt eitt eða neitt, heldur að ég hafi hlaupið - á þýsku. Í gær var sem sé brennt í fyrsta langhlaup sumarsins, sem samkvæmt borgarvefsjá reyndist 8,5 kílómetrar. Tempóið var með rólegra móti, enda stefnt meira á seiglu en spretthörku. Niðurstaðan varð hins vegar tími sem hefði lokið 10 kílómetrunum á 55 mínútum.
30. júlí 2005 | 0 aths.
Þá er ég á leið heim í sveitasæluna í verslunarmannahelgarskrepp. Reyndar átti ég bókað far fljótlega eftir hádegið, en fékk í gær skilaboð frá flugfélaginu um að fluginu hefði verið seinkað framundir kvöld. Ég tek mér svo frí á þriðjudeginum og kem til baka til borgarinnar á þriðjudagskvöldinu.