thorarinn.com

Aprílgabbið 2006

31. mars 2006 | 9 aths.

Þegar maður hefur skapað hefð fyrir brilljant vefgöbbum, ár eftir ár og meira að segja álpast til að falla fyrir síns eigins gabbhugmynd er ekki laust við að það sé komin viss pressa á að gera eitthvað snjallt.

Hvort það tókst þetta árið á eftir að sanna sig, en mér finnst þetta góð hugmynd. (Og er eins og flestar slíkar byggð á innblástri frá öðrum, meira um það neðar.)

Svindlari, svindli svindl!

Ég viðurkenni að það er örlítið óheiðarlegt að virkja gabbið 31. mars, en þar sem 1. apríl ber upp á laugardag og ég veit að ég fæ mun minni umferð um helgar er þetta einkum gert af tillitssemi við lesendur sem annars hefðu misst af upplifuninni!

Þess ber að geta að þetta á sér stoð í reglugerð Evrópusambandsins um aprílgöbb sem Ísland lögfesti 2003. Þar segir meðal annars:

[...]Beri 1.apríl upp á helgidag eða frídag er leyfilegt að hefja vefgöbb á síðasta virka degi fyrir 1.apríl. Enda sé skjalfest að umferð um viðkomandi vefsvæði sé merkjanlega minni á frídögum og viðkomandi gabb uppfylli þær kröfur til metnaðar sem lýst er í málsgrein 104.

Hvað gerðist annars?

Ef þú skyldir hafa misst af því hvað gerðist (eða vera að lesa þetta eftir 1. apríl) fólst spaugið í því að þegar beðið var um forsíðuna birtist þess í stað listi yfir möppur og skrár.

Fyrir þá sem eru kannski ekki innvígðir í veffræðin þá birtist svona listi á vefsvæðum þar sem vantar upphafsskrá (sem heitir oftast index.html) eða ef skráin hefur verið vistuð undir röngu nafni (t.d. indez.php í stað index.php).

Þegar þetta gerist er ekki nóg með að forsíðan birtist ekki sem skyldi, heldur verða sýnilegar skrár sem e.t.v. var aldrei ætlast til að almenningur kæmist í.

Í mínu tilviki leit listinn svona út (hér hafa þó allir tenglar verið gerðir óvirkir).

Þegar smellt er á einhvern af þessum tenglum er valið skráð í gagnagrunn og rétta forsíðan birtist með þökkum fyrir þátttökuna. Smákaka á svo að sjá til þess að gabbið sjáist bara einu sinni á hverri tölvu.

Hverju fellur fólk helst fyrir?

Ef listinn er skoðaður sést að þar kennir ýmissa grasa og ætti að vera eitthvað við flestra hæfi forvitni.

Þegar ég prufukeyrði þetta á Emilie vakti skráin "birgitte.jpg" mesta athygli hennar og viðbrögðin voru eitthvað í líkingu við "Hvem er Birgitte? Er det... Har du fået en kæreste?!"

Aðrir eru kannski forvitnari um lykilorðaskrána eða xxx möppuna...

En niðurstaða fjölskipaðrar dómnefndar ætti að liggja fyrir á laugardagskvöldið þegar lokað verður fyrir gabbið og talið upp úr gagnagrunninum.

Kveikjan

Uppfært: Ég gleymdi víst að vitna í heimildir.

Grunnurinn að hugmyndinni kviknaði fyrir ári þegar ég rakst á umfjallanir um aprílgöbb í blogospherinu svokallaða og Waferbaby hafði gert aprílgabb þessu líkt. (Mér sýnist reyndar að hann sé í ár búinn að taka útgáfuna sem ég stakk upp á við Má hérna um árið sem núverandi aprílgabb, þannig að hringnum er lokað.)

Tæknilega hliðin

Varað er við því að eftirfarandi er pínu tæknilegt. Viðkvæmum sálum er því bent á að fara beint í að skilja eftir athugasemd og rökstyðja val sitt.

Lykillinn að gabbinu er mod_rewrite möguleiki Apache sem býður upp á það að vísa vefslóðum annað innan vefsvæðisins.

Þannig eru allir linkarnir trúverðugir og virðast vísa á umræddar skrár (ekkert ?id=x subberí), en þar sem engin þessara skráa eða mappa er í raun til á vefsvæðinu (nema cgi-bin sem ég nota ekki) getur mod_rewrite gripið þær á bak við tjöldin og vísað áfram á síðu sem vistar valið í gagnagrunn.

Smákaka á svo að tryggja að gabbið birtist bara einu sinni á hverri tölvu/vafra samsetningu.

Það var svolítill höfuðverkur að búa til lista sem væri þokkalega trúverðugur en samt með bitastæðum valkostum (og má ekki innihalda nöfn sem eru raunverulega til) og ég bíð spenntur að sjá hver viðbrögðin verða. Bakgrunnsvirknin sem vistar valið í gagnagrunn er að mestu copy-paste úr sambærilegum fídusum annarsstaðar á vefnum.

Til að fá traustari niðurstöður nota ég humans/robots virknina mína til að sía þekktar leitarvélar frá án þess að skrá þeirra val. Enda er það í þeirra eðli að smella á alla mögulega linka og neita að taka við smákökum.

Lox bjó ég til falsaða færslu í RSS skrána mína til að fanga þá sem hugsanlega stóla á RSS lesara og hefðu þess vegna ekki kíkt á forsíðuna ella. Og fyrir þann markhóp passaði ég mig að þessi færsla sem þú ert að lesa birtist ekki í RSS-inu (a.m.k. ekki fyrr en eftir 1. apríl).

Was it good for you too?

Eitthvað um þetta að segja?